1پەرۋەردىگار ماڭا:
_ سەن ئىسرائىللارنىڭ پادىشاھلىرى ئۈچۈن تۆۋەندىكى مەرسىيەنى ئوقۇ، _ دېدى.
2«ئوخشايتتى ئاناڭ نېمىگە؟
ئوخشايتتى ئۇ شىرلار ئارىسىدىكى ئانا شىرغا،
بالىسىنى باقاتتى ئۇ، يېتىپ ياش شىرلار ئارىسىدا.
3بېقىپ ئۇ بىر كۈچۈكىنى،
كۈچلۈك شىر قىلىپ چىقتى ئۇنى.
ئۆگەندى شىر كۈچۈكى ئوۋ ئوۋلاشنى
ۋە ئادەم يېيىشنى.
4بۇنى بىلىپ باشقا ئەللەر
تۇزاق قۇرۇپ ئۇنىڭغا، تۇتتى ئۇنى
ۋە ئېلىپ كەلدى بۇرنىغا ئىلمەك سېلىپ مىسىرغا.
5كۈتۈۋېرىپ ئانا شىر ئۇنىڭ قايتىپ كېلىشىنى،
ئۈزدى ئۇنىڭغا باغلىغان ئۈمىدىنى.
ئۇ يەنە بېقىپ بىر شىر كۈچۈكىنى،
كۈچلۈك شىرغا ئايلاندۇردى ئۇنى.
6ئايلانغاچ ئۇ كۈچلۈك شىرغا،
يۈرەتتى ئۇ شىر توپىنىڭ ئارىسىدا.
ئۆگەندى ئۇ ئوۋ ئوۋلاشنى
ۋە ئادەم يېيىشنى.
7ئۇ بۇزۇپ يات خەلقلەرنىڭ قەلئەلىرىنى،
خارابە قىلدى شەھەرلىرىنى.
تىترەيتتى يەر-جاھان ئاڭلىسا ئۇنىڭ ھۆركىرىگەن ئاۋازىنى.
8شۇڭا يات ئەللەر تەرەپ-تەرەپتىن ھۇجۇم قىلىپ ئۇنىڭغا،
چۈشۈردى ئۇنى تورلىرىغا.
چۈشتى ئۇ ئۇلارنىڭ تۇزىقىغا.
9ئۇلار ئىلمەك بىلەن تۇتۇپ ئۇنى، سولىدى قەپەسكە،
ئېلىپ باردى بابىل پادىشاھىنىڭ ئالدىغا.
ئۇ تۇتقۇن بولغاچ ئۇ يەردە،
ئۇنىڭ ئاۋازى ئاڭلانمايدۇ ئىسرائىلىيەنىڭ تاغلىرىدا.
10ئاناڭ ئۈزۈمزارلىقتىكى ئۈزۈم تېلىغا ئوخشار،
ئۈزۈم تېلى تىكىلگەچ سۇ بويىغا،
مېۋىسى مول، ياپراق، شاخلىرى قويۇق ئىدى،
چۈنكى ئۇ ئىدى مول سۇ بويىدا.
11ئۇنىڭ شاخلىرى پادىشاھنىڭ سەلتەنەت ھاسىسى بولغۇدەك قاۋۇل ئىدى،
باشقا ئۈزۈم تاللىرىغا قارىغاندا ئېگىز ئۆسكەنىدى.
ئۇنىڭ ياپراقلىرى ناھايىتى قويۇق ئىدى ۋە ئۇلارنى يىراقتىن كۆرگىلى بولاتتى.
12لېكىن ئۇ غەزەپ بىلەن يىلتىزىدىن قومۇرۇلۇپ، يەرگە تاشلاندى.
چۆلدىن كېلىدىغان ئىسسىق شەرق شامىلى مېۋىلىرىنى قۇرۇتتى،
باراقسان شاخلىرىمۇ قۇرىدى.
ئوت ئۇنى يالماپ يوقاتتى.
13ئەمدى ئۇ چۆلگە،
يەنى قۇرغاق سۇسىز يەرگە تىكىلدى.
14ئوت ئۇنىڭ شاخلىرىدىن تۇتىشىپ،
مېۋىلىرىنى كۆيدۈرگەنىدى،
سەلتەنەت ھاسىسى بولغۇدەك بىرەر قاۋۇل شېخىمۇ قالمىغانىدى.»
بۇ بىر مەرسىيەدۇر، بۇنى مەرسىيە قىلىپ ئېيتىڭلار.
